Bummel 2019

Am 24. Merz 2019 hän sich d Basler-Gwäggi zue iirem Bummel droffe. Los gange isch es in Allschwil bi aim vo de zwai Organisatore (Cyrill) uff die zääni de morge. D Gwäggis sin mit eme ganz tolle Bröntsch verweent worde. E härzligs Danggerscheen au an d Simone.

No däm alli dr Buuch gfillt hän, isch es mit der BVB wyter gange an Baanhof SBB. Nacheme glaine Fuessmarsch iber d’Bassrelle sin mir bim Bowling-Center aakoo. Do sin zwai Baane fir uns reserviert gsi. Me hett in dääne knapp zwai Stund gli gsee wäär in däm Sport Maischter isch. (Pascal V.) Dr Plausch isch drotz ainigge Fäälversyech sau guet gsi und mir hänn vyyl zem lache gha.

Drno sin mir z Fuess in Zolli spaziert. Dert aakoo isch dr Durscht gross gsi, unsere Leerbueb (Pascal F.) hett welle e Rundi ussgää, isch aber an de vyyle Lyt gschytteret (git Minus-Pinggt by dr Abstimmig an dr GV…J). Somit isch die kurzi Zyt bis zem neggschte Höhepunggt sehr drogge verbyy gange. Piggtlig uf die drey z Mittag sin mir vom Dierwäärter (dr Marc) ab-ghoolt worde, fir e Fierig im Australie-Huus. S isch wirgglig intresant gsi, was uns dr Marc iber die Dierwält het kenne verzelle. Dr ganz grosse Hyt isch dr Abschluss mitem fietere vo de Kängeruus gsi.

Au do isch Zyt schnäll verbyy gange und me isch durch s Nachtigallewäldeli Richtig Stadt spaziert. Uff emene Brüggli hett dr Fotograf (Pascal E.) dr Befääl gä zem bleed aanestoo, dass äär uns ka fotografiere fir s Portrait uff unserer Homepaitsch. No däm Zwischestopp sin mir denn im Rest. Spärber aakoo wo fir uns e Disch zem Nachtässe reserviert gsi isch.

Aaschliessend sin mir frisch gsterggt in d Frey-Stroos gange go d Parade abnee. Bi me Schlummerbächer hän mir dä ganz tolli Bummel ussklinge loo.

Dr Schryyber (Edi) sait im Name vo allne Gwäggi de zwai Organisatoore (Cyrill und Alte) ganz härzligg Danggerscheen. Si häns wirgligg guet gmacht.

Leave a Comment

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.