E herrlige Uusflug in e scheeni und interessanti Stadt mit tolle Sehenswirdigkeite isch vyyl z’schnäll verbii gange.
Nacheme kurzwiilige Flug nach Krakau isches direggt ins Hotel und aaschliessend zem erschte organisierte Ässe gange. In dr traditionelle Krakauer-Beiz „Starka“ hets wärschafti Koscht herrlig zuebereitet ge. Aaschliessend isches no e weneli uf Erkundigsduur gange, was die Stadt am Oobe bietet. Nur so vyyl, s aint oder ander Bierli oder Wyyli hets scho no ge, es isch uf jedefall nit langwiilig worde.
Am Frytig uf die eins hets dene s erschte „Hailait“ ge; bi scheenem Sunneschiin sin mir mit eme Elektromobil (die Gfährt khere zem Stadtbild…) uf e dreystündigi Stadtrundfaart. Vyyl Informatione iber d Stadt und ihre Sehenswürdigkaite, aber vor allem emol nit laufe…:-) E Halt bi dr „Schindlers Fabrik„, verbunde miteme Rundgang, isch iidrügglig und noochdängglig gsi. Bilder, Requisiite und Briefe hän uns e Bild vonere schlimme Zyt ge.
Dr Hunger het uns aaschliessend in aini vo de vyyle Baize gfiehrt und es het nomol typischi Spezialitäte vo Krakau ge, wo aber nit „jedermanns Sach“ gsi isch. Was der Bauer nicht kennt oder so… aber lömmer das…:-) S Bier het uf jedefall allene gschmeggt.
Nochere kurze Erhooligspause im Hotel simmer go z Nachtässe. Au do het dr Pit guet uusgsuecht, im „Kogiel Mogel“ hets e feins Ässe ge, nur dr Service het no e weneli optimierungs Potential. Aaschliessend sin mir nomol in die dungglere Egge vo dr Stadt; Musig und dr aint oder ander Cockdail het uns dene bis in d Morgestunde (isches scho häll gsi…?) begleitet… es hän uf jedefall alli wider zrugg ins s Hotel gfunde, mit oder ohni Hilfsmittel.
Dr Samstig isch ebefalls verplaant gsi; ab mit em Taxi zem „Salzbärgwärg Wieliczka„. E iidrügglige Rundgang in de Tiefene vo däm Bärgwärg het uns e Bild ge, was do an Arbet dehinter gsteggt het, und was das Bärgwärg fir die ganzi Region bedütet het. Nach dere salzige Aaglägehait hän mir dene alli wider e glai wenig Hunger und vor allem (wer erstuunts…) Durscht ka. Zwei XXL Pizzas und, me glaubts kuum, e ladig Bier hän gholfe d Zyt bis zem Nachtässe z iberbrügge.
Fir unsere letschte Obe isch e speziells Restaurant uusgsuecht worde; Im „Albertina“ isch dr Maage und dr Gaume so richtig verweent worde, es het aifach alles basst und gstumme. Absolut Top gsi… Aaschliessend hets e glaine Spaziergang ge, bis mir e stimmigs Blätzli zem dusse sitze gfunde hän; feini Cockdails hän dr Obe abgrundet. Do d Kondition bim ainte oder andere doch e weneli nooche glo het, isches hütte friehner zrugg ins Hotel gange.
Am Sunntig isches schliesslig scho wider sowiit gsi. Dr Flieger het am spötere Vormidaag uf uns gwartet und het uns mit e wenig verspöötig wider zrugg nach Basel brocht.
Es isch e herrlige Uusflug gsi, wo aifach alles basst het. Au do nomol e riise Danggscheen an unsere Organisator Pit.
Übrigens, do kasch e paar Bilder vo unserem seriöse Jubel Uusflug gseh.