Trotz „Corona“; am 15. Merz 2020 hänn sich d Basler-Gwäggi zue iirem Bummel droffe. Los gange isch es, wie s letscht Joor, in Allschwil bi aim vo de zwai Organisatore (Cyrill) uff die halber elfi de morge. No em Friiehschobbe hänn mir am rychhaltig deggte Disch Platz gno und hänn ussgiibig dr Bröntsch gnosse. E härzliggs Danggerscheen an d Hälferinn und d Hälfer.
Am halber zwai isch den Uffbruch aagsait gsi. D BVB hett uns an Bahnhof brocht. Die erschte Vermuetige sinn lutt worde, dass mir e Revansch, bim Boolingspiile bikemme. Aber nyt isch gsi mit dääre Vermuetig. An d Frobestrooss sin mir gfiert worde vom Pascal E., denn dert hetts e Rätselschopp wo „one hour escape“ haisst. E baar vo de Gwäggis hänn s kennt, denn es git e baar so Unternääme in Basel.
No dämm dass mir uns gschtärggt hänn mit eme „Hopfetee“ hett uns e nätti Dame e Iifiiehrig gää wie das Spiel funggtioniert. In zwai Gruppe sinn mir denn in dä jewiligi Ruum gange und hänn e halb Stund Zyyt ka zem ans Ziel z koo. Beidi Gruppe sinn nit in dr vorgäbener Zyyt zur Leesig ko. No dr kurze Stergig (Hopfetee) sinn die beide Gruppe, in dä Ruum vo dr andere Gruppe gange, um noone mool iir Keene s zaige. Ai Gruppe hetts denn tatsächlig gschafft in dr Zyyt zur Leesig zglange.
Drno hetts e glaine Spaziergang in d Stadt gää. D Steine hett uff is gwartet denn dr Durscht isch gross gsi und mir hänn miesse ufftangge. Dr Cyrill hett gmaint, dass mir jetzt e Stund uff em Droggene sinn. No dämm glaine Zwischestop isch es Richtig Barfi gange und denn die grossi Stääge duruff zem Gymi. Deert aa koo hett dr Gabmacherjoggi uff is gwartet. Är hett den in dääre Stund e Fiehrig mit is gmacht wo s Thema ka hett „“Henker und Dirnen“. Sehr wort- und gestigrych hett dr Grabmacherjoggi uns dur dr Kohlebärg zem Leonhardtskirchblatz und dur dr Leonhardtsgrabe an Spalebuggel gfiiert. Usgiebig hett är iber dr letscht Hengger von Basel und de Freudemaitli verzellt. Au ibere ryche „Migrant“ wo e brächtig Huus am Leonhardtsgrabe kauft hett und denn pleite gange isch. Zwai Joor no sym Doot hett me dä Maa sogar no zum Doot verurteilt. Sydämm duet in däm besagte Huus e Geischt woone und es spuuggt dert. Gschpiggt mit Witz, Humor und mit Verglich mit dr Gegewaart hett uns dr Grabmacherjoggi dur die Stund gfiert. Es isch super und intressant gsi und mir hänn viil glacht.
Noneme glaine Fuessmarsch sin mir am Barfi aakoo und hänn e Apero gno vor dr Rio Bar. Fir s Nachtässe isch im Restaurant Kiechli reserviert gsi fir uns. Gmietligg isch es gsi und drotzdäm isch Zyyt z schnäll vorbi gsi. Bevor mir alli denn haim sin, hänn mir no e Schlummerbächer gnäämigt in dr Steine.
Dr Schryber danggt, ich glaub im Name vo allne Gwäggis, de beide Organisatore und freut sich scho uff dr näggscht Bummel im 2021.