Nit as es amänd vergässe goot mecht y de Oorganisadoore e grosses „Danggerscheen“ usspräche. Dr Gigi und dr Cyrill hän e tolls Brogramm fir d’Gwäggi zämmegschtellt. S’isch e herrlige Bummel gsi.
Am 12. Meerz 2023 hän sich d „Basler-Gwäggi“ zue iirem Bummel droffe. Wie allewyyl, ischs am niini bim Cyrill dehaim loosgange. Nooem Friiehschobbe hänn mer amene ryychhaltig deggte Disch Blatz gnoo und e ussgiibige Bröntsch gnosse. E härzliggs „Danggerscheen“ au an d Simone.
Am 11:20 sin mer denn Richtig Drammstatioon gloffe und mitem Drämli bis Moorgaartering, in 36er umgstiige und bis zem Lehemattquartier gfaare. Immer no aanigsloos wo’s aanegoo kennt, hett ys dr Cyrill am änd ins alte Häfeli Areaal gfiert. Imme eldere Huus im Zwaite Stogg, het sich denn s Ghaimnis uffgleest… Virtual Reality Center Basel & Escape Room isch deert dehaim.
Jetz isch’s Allne klar gsi, ass mer in d 3D-Wält yydauche wäärde. Nooere dieffe Yyfierig und em fasse vonere tolle Ussryschtig, hets ändlig kenne loosgoo.
Am Aafang no e weeneli zeegerlig sinn d Gwäggis in die spezielli und au speggdakulääri Wält yydaucht und ummegloffe.
Mer hänn ys eso woolgfiilt, ass s laufe iiber schmaali Brätter iberem Abgrund, wie au e rasanti Floosfaart uffeme Lavastroom kai Brobleem me gsii isch… sogaar e Drache wo Fyyr gspuggt het, hänn mer uffem Wääg no aadroffe. E halb Stund speeter isch alles scho wider vrbyy gsii.
Drnoo hetts no ebbis zem dringge und gnabbere gää und alli hänn no wild mitenand iiber daas diskutiert, wo me zämme erläbt het.
Dusse hänn mer den vrgääbens uffe Bus gwaartet, well d’Bolizey beraits jetz scho d Stroosse wäggem FCB Matsch abgspeert hänn. Mer sinn denn bis zer Drammhaltstell „St. Jakob“ gloffe und mit em 14er Dramm in d’Innerstadt gfaare. Drnoo sin mer am Seibi ussgstyyge und bis zem Theaaterblatz gwagglet, wo mer zämme e Hopfetee gsiirpflet hänn.
Schlaag uff Schlaag ischs denn wytergange und hänn e tolli Fierig duurs Stadtheaater gnosse. Wo mer denn im Theaater-Fundus aakoo sin, het me e mängge Gwäggi nimm heebe kenne. Si hänn beraits fir d Fasnacht 2024 scho ganz e huffe Utensilie gfunde.
Jetz isch aber heggschti Zyt gsi fir dr Apèro im „Stöckli“, denn mer sinn fascht scho wider am verduurschte gsi. Frisch ufftanggt sinn mir denn Richtig „Schnabel“ abzottlet, wo fir ys e Blatz firs z’Nacht reserviert gsii isch.
Nooeme glaine Fuessmaarsch und gsteergt duurs feyne z’Nacht, sinn mer denn in dr Freyestrooss glande, wo mer no e weeneli hän deerfe d‘Glyggene und d‘Guggene gniesse. Gmietlig ischs gsi und ainewääg isch d‘Zyt vyyl z‘schnäll vrbyy gange. Bevoor denn e Dail vo de Gwäggi haim isch, hänn mer ys bim Määrzblatz no e Schlummerbächer gnäämigt. Esoo isch dr Gwäggi Bummel 2023 z’Änd gange, fir die ainte z’frieh und fir die andere grad richtig.
Dr Schryber bedanggt sich im Namme vo allne Gwäggis ganz häärzlig bi de baide Organisadoore und freyt sich jetz scho uff dr Bummel 2024… und d’Gwäggis saage e härzligs „Danggerscheen“ im Schrriberling Edi fir dä Bricht.