Draditionell am zwaite Bummelsunntig hän sich d’Gwäggi z’Allschwil bim Cyrill troffe uff die zähni d Morge. Noch em Begriessigsdrungg, in Form vome Schnäpsli, hämmer deerfe Platz nä am rychhaltig deggte z’Morgedisch zum Brönsch. D’Fasnacht isch natirligg s’Hauptthema gsi. Die aint oder anderi Episode isch mit viil Lache und Schmunzle zem Beschte gä worde.

Am viertel ab ains sin den Gwäggi uffbroche um mit em Tram Nr. 6 ins Glaibasel zglange. S’Ziel isch dr Claraplatz gsi. E baar von de Gwäggi sin uff die Idee ko ass mir d’Mäntigsroute jetz z Fuess ablaufe dien wo mir vor em Holzschopf akoo sin. Nadyrligg isch das nit dr Fall gsi. Dr Schryber vo däm Bricht hett den d’Gwäggi ane unschynbar Huus an dr Clarastroos gfiert, nämligg zr Stadtbrennerei vo Basel. Deert hett am zwai am Nomidaag scho dr Daniel gwartet und uns in Empfang gno. Är und si Brueder sin Bzitzer und betriebe die Brennerei syt 2017. Die nochfolgendi Fiehrig inkl. Deguschtation isch sehr intressant gsi. Aber nit jede Schnaps hett de Jungs gschmeggt. Dr Fifi ka e Liedli drvoo singe! Aber es isch e tolli Sach gsi emool z’erfaare was es alles bruucht und drhinter steggt bis zem fertige Broduggt inkl. Ufflage, Keschte etc..

Am vieri hett den dr Flo zem Uffbruch pfiffe. Mir sin den Richtig Grossbasel gschländeret. Deert hett e glai Schiffli am Ufer gwartet uff ys. D’Iberraschig isch gross gsi wo mr gsee hänn das e feyn Fondue uff ys wartet, denn e jede hett doch scho wieder e glaine Hunger gha no em Bsuech vo dr Brennerei.

Die folgendi ca. anderthalb Stund sin mir dr Bach duruff und durab gfaare und hän die brächtigi Kulisse vo Basel kenne bewundere und s Fondue gniesse. Wo mir denn wieder, gsättigt und in beschter Stimmig, am Iistiegsort akoo sin hett’s scho in dr ganze Stadt pfyffe, gruesst und gschränzt.

D’Gwäggi sin den Richtig Barfi zoge und hän sich spontan für e Steerggig entschiede im Stöckli bevor mir unsere „Stammplatz“ vor em Latini, fir d’Parade abznä, bezoge hän.

Dr Oobe hämmer den ussklinge lo vor em Schnabel wo Jubel Trubel und allewyl viil los isch.

S’Fazit vo däm Bummel, wie keents au andersch si; Glatt hämmers ka jede isch begeischtert gsi! Somit isch e tolle Daag z’Änd gange.

Am Schluss danggt dr Schryber dr Simone und em Cyrill fir’s gaschträcht wo mr wieder hän deerfe gniesse und au mim Mitorganisator Flo e härzlig Dangscheen fir dä herliggi Bummel 2024.