Am zwaite Bummelsunntig findet dradizionell unsere Gwäggi-Bummel statt. D Organisation hän dr Raymond und Flo iberno. Viile härzligge Dangg!

Am elfi isch Träffpunggt gsi in dr Fäldstrooss bym Cyrill. Dr Disch isch scho richligg deggt gsi, doch e ai Bligg hett glängt und Alli hän s gse: S METT het gfällt. Dr Danilo, wo zuständig gsi isch hett s vrgässe dehai.

Mir hän kräfftig zue glänggt by de feyne Sache wo uff em Disch gstande sin. Zwischeduure hetts aber au immer wider e glai Schnäppsli gä wo no ibrig gsi sin vo dr Fasnacht. Am halbi zwai isch den Uffbruch gsi und mir sin los mit em säggser Dram an d Heuwoog uns sin deert umgstiiege uff e Gilbexpress Richtig Arlesheim.
 Unseri Organisatore kenne sich aber noonig so guet in dr nööchere Umgääbig vo Basel uss: Zerscht sinn mir z frieh ussgschtiige und hänn bi sehr warme Temperature döörfe laufe bis an näggschte Brogrampunggt. Au das isch nit ganz aifach gsi, denn in däm Areal vo „uptown Basel“ isch nüt a gschriibe gis uns mir hän miesse sueche. Dä „langi Spaziergang“ und die Suecherei hett Dursch gä. Do mir aber no waarte hän miese hett uns dr Flo gredded mit eme Hopfetee.

Uff die Drei isch den s Ghaimniss uff gleest worde will mir bis do aane kai blasse Schimmer ka hänn was uff uns wartet! Pfyylbogeschiesse isch a gsait gsi. Imme Gebäude im Undergschoss isch e Indoor-Bogeschiesshalle. Dr Scheff deert het uns zerscht e Ifierig gä iber d Sicherhait, s Verhalte uff was me muess achte bim Bogeschiesse. No däre Instruggdion isch es los gange und mir hänn deerfe uff Ziielschiibe (10 m) schiesse. Gly sinn die erschte Jubelschrey dur d Halle deent wo die erschte in d Mitti droffe hän. Mir hän au deerfe verschiedeni Bööge usbrobiere und au uf greeseri Dischtanze unseri Dräffsicherheit under Bewiis stelle. Dr Höhepunggt isch s Ballonschiesse gsi! Do hetts e mänggmool knallt. Au dr Ball wo hy und här pendlet isch hett grosse Spass gmacht. Zyyt isch im Flug vorbi gange.

Am fimfi isch fertig gsi und d Gwäggis sin uff e Wääg Richtig Basel wo uns scho d Fasnachtsmusig empfange het. E glaine Aperos hett s no gä uff em Wääg ins Gifthüttli, wo fir uns reserviert gsi isch fir s Nachtässe. No däm wieder verpfläggt sin gis sin mir vor s Roothuus go „Parade“ ab nä.

Dr Bummel ussklinge loo hän mir den vor em Schnabel wo Jubel Trubel gis isch bis kurz noo de zääni, wo s agfange hett „Schiffe“.

Am Schluss danggt dr Schryber dr Simone und em Cyrill fir’s Gaschträcht wo mr wieder hän deerfe gniesse.

Kurz um; s isch wie allewyyl e tolle Bummel gsi!