Bummel 2026

Bi scheenschtem Wätter und herrligem Sunneschyn hett unsere Gwäggi Bummel am 2 Sunntig no dr Fasnacht stattgfunde.

Dräffpunggt isch vor em Bruune Mutz gsi und zwor am zääni de Morge und erscht no verpfläggt. Denn dasmool isch laider kai herrligge Brunsch bym Cyrill dehai uff em Brogramm gschtande. Was soll den das ha ych dänggt, wo d Yylaadig für dr Bummel ko isch!
Mit em Drämli bi ych bis an Barfi gfaare und scho ha ych gsee, dr Bruuni Mutz hett no gar nonig offe. Somit fallt dr Frieschoppe au ins Wasser wie dr Brunsch. Das goot jo scho guet los ha y dänggt.

Noodäm dass den Alli emool do gsi sinn hett der Kevin (eine vo de Organisatore) zum Uffbruch gruefe und zwoor Richtig Määrtplatz. Mir sinn los spaziert; viil isch um die Zyyt nonig los gsi, usser die wo Bummel hän a däm Daag sin underwägs gsi. Am Määrt a koo froogt eine vo uns dr Pascal V. (dr zweit Organisator): „Und jetzt, was mache mir, gits jetzt ebbis zem sirpfle“? „Warte uff s Drämli Nr. 14, Richtig Barfi“ isch d Antwort vom Kevin gsi. Was soll den das frooge mir is Alli. „Zyyt z doot schlo und verwiierrig sorge“ maint dr Pascal V. „Immer no nüt zem dringge“ isch lamentiert worde. Aber au in dr nöchi vom Määrtplatz hett kei Baiz scho offe ka.

Mittlerwyyle isch dr 14-er koo und mir sin ygstiige. Wo mien mir usstiige isch gfroogt worde und gits deert ebbis Flüssigs? D Anwort isch schnäll ko: „Bym Joggelistadion“. Durscht hämmer immer no ka!

Wo mir den im Joggeli a koo sin saage die zwei Organisatore mir laufe jetzt Richtig Schänzli, also über Birs. Und plötzlich hett aine vo uns das Schild „Axt Bude“ gsee. Jetz isch Allne e Liecht uff gange: Mir geen go „Beili“ wäärfe.
No dr Begriessig vom Scheff und enere Iifiehrig (Sicherhait, Wurftechnik etc.) hän mir deerfe losleege. Am Aafang isch s nonig eso guet gange aber je länger mir die Axt gworfe hän desto besser sin d Resultat worde. Zwischeduure hetts den e Bierli gä. Bevor die zwai Stund vorbi gsi sin hän mir no e Turnier gmacht wo dr Flo schlussändlig im emene dramatische Final gwunne hett. Jetzt fäält nur no e Lassowäärferkurs und mit Gwäggis wääre e perfäggte „Indianer“, hett dr Alt gmaint!

Drno sin mir an Birs aabe wo dr Kevin und dr Pascal Bier, Sandwitsch sowie Mett uss de Ruggsegg gholt hän und uns s Mittagässe serviert hän. S Bier hett nit wyyt glängt, denn dr Durscht isch scho gross gsi.  Dr Oobmaa und dr Oli sinn den bim Spar go Nochschub hole.

Am Nomidaag isch denn e Stadionfiehrig uff em Programm gschtande. Mir hän deerfe hinder Kulisse vom Stadion luege wie z.B Aufwärmruum, Prässeruum, div. Losche etc. Dr hailigi Rase z beträte isch uns aber verbote worde, drfür hän mir uff dr Ersatzbangg deerfe Platz nä. Die zwai Schtund sin im Flug vrbi gange. Au s Verlange no emene Bier isch kund do worde. No dr glaine Stärgig hän mir uns, mittels ÖV, uff e Wääg in d Stadt gmacht.

Vom Aescheplatz sin mir uff e Theaterplatz bummlet, wo scho s bunte Fasnachtsdriibe uns in Empfang gno het. Au unseri befriendeti Guggemusig het grad e Platzkonzärt zem Beschte gä (viilicht fir uns?). Uff jede Fall hän mir e grossi Freud ka. Belohnt worde, fir unser Bravorief, sin mir denn zem  Bier iiglaade worde vo Iine.

No däm dr Durcht glöscht gsi isch het s OK uffgruefe sich langsam Richtig Stainevorstadt z laufe, wo im Kiechli fir uns reserviert gsi isch. Während mir s Nachtässe gnosse hän isch dusse gruesst, gschränzt und pyffe worde. Uff die siebeni sin denn Gwäggis in dr Freiestroos akoo um d Parade vo de Glygge abznä. S isch herrlig gsi. Am Schluss sin mir vor em Schnabel glandet wo mir dä tolli Bummel ussklinge loo hän. Gmietligg isch es gsi! Schaad isch Zyyt so schnäll vorbi gange.

S’Fazit vo däm Bummel, wie keents au andersch si; Glatt hämmers ka jede isch begeischtert gsi! Somit isch e tolle Daag z’Änd gange

Dr Schryber danggt, y glaub im Name vo allne Gwäggis, de beide Organisatore und freut sich scho uff dr näggscht Bummel im 2027