Dr letschi Waagebau vo dr Fasnacht

Miir sind baraad! D Fasnacht gha ghoo.

Bis zletscht hänn miir unser Sujet ghaim heebe ghönne. Sälbscht dr schwyzer Ghaimdienscht het nüt vo unserem Sujet ghönne erligge. Guet, wenn me waiss was fyr Schmiirlumpe deert schaffe, den isch daas au nid wyters verwunderlig. Wie au immer. Syt em Rädäbäng isch es den au fir die Schloofghappe den klaar woorde was miir usspiile. Nur guet das miir e lieblig Thema hänn usgsuecht. Sunscht hätte die no miesse richtig schaffe, do dr Cortège jo zu de Bürozyte stattfinded. Das wär womööglich no unagnääm woorde fir uns. Aber soo isch alles guet.

Eso hänn miir gmietlich unsere letsche Waagebau ghönne gniesse. Dr Waage sälber isch jo scho syt leschte Samschig feertig. Es isch also numme no s’Draggdoorgstell zum mache gsii. Dr Kevin hed scho frie us de Fäädere miesse, zum mit em Bappe dr Draggdoor go hoole. So um die elfi sind sii den beidi am Waagebaublatz iidroffe. Miir andere hänn scho alles baraad gmacht zum dr Draggdoor z’schmügge. Au jede hed aapaggt und es isch guet gschafft worde. So hänn miir s’Draggdorgstell schnäll am Draggdoor gha. Und den isch es au scho ans schmügge gange.

Um d’Midaagszyt het sich den au d’Irma d’Doose (Pascal) gmälded. Gulasch isch uf em Menüplaan gstande. Do s’Wätter sich vo dr guete syte het zeigt hänn miir unter freiem Himmel könne spiise. S’Gulasch vom dr Irma d’Doose isch dr absoluti hammer gsi. Do nid ganz Alli vo dr Clique zum Waagebau sind ghoo, wo sich hänn aagmälded, het e biz mee fir jeede gha. So het sich jeede no e zwaiti Borzioon ghönne gnäämigd.
Gulasch hets zem Gligg gnueg ghaa, numme s Broot isch e weeneli knapp gsii. Do d Irgard (Michel) sich grad e halbs Broot het welle ghralle het sich d’Brootsituazioon no e biz mee verschärfd. Doch nach guetem zuereede het ääs den doch no ghönne daile.

Zem Schluss hänn miir den nomol Alli richtig aapaggt und dr Räscht feertig gmacht. Um die halb-fieri sind miir den feertig gsii.

Ich möcht mi an dere Stell nomol an Alli bedangge fir dr tolli Yysatz am Schluss. Das het super klappt. Jetzt ghaa d’Fasnacht also ghoo.

Leave a Comment

Deine E-Mail-Adresse wird nicht veröffentlicht. Erforderliche Felder sind mit * markiert.