Nöijoorsässe vo de Gwäggis

Do myr jo kei Wiehnachtsässe mache, s’isch hützudags jo scho fascht Politisch unkorrägt säll so z nenne, hän myr jetzt ebe e Nöijoorsässe ka. Dr Vo-Gunte het s’Ufgöbeli beko e gueti Beiz in Basel z finde wo myr uns verköschtige könne.

So hän myr uns nach emene produktive Wagebau den au z’Obe uf die Sibni vor dr Beiz Restaurant Cuor d’Oro troffe. Vo usse het si dr Yydrug vonere gmietlichi Quatierbeiz gmacht. Nachdäm unseri Schlooter yri Frösch fertig dampft hän, sin myr den alli in Beiz iine gange. E lange Tisch het scho uf uns gwartet. Do die Meischte überpunklich sind gsy, isch dr Organisator Vo-Gunte als letschte in d’Beiz iigloffe, in Begleitig vo dr Heidi, em neue Fraueli an synere syte.

Jahresessen-2016-01Nachdäm alli Platz hän gno, isch dr Wirt au scho ko um die erschti Bschtellig uf z’nää. So het jede scho mol öbis z Tringge ka. Mir hän alli no an dr Menü Karte umme studiert, wo dr Wirt uns e Gruess vo dr Kuchi in Form vo Bruschetta gschiggt het. Näbscht de Menü’s uf dr Karte hets natürlich au Tagesspezialitäte gä. Eins drvo (ha mir nur das könne merke) isch e früsche Nüsslisalat mit Croutons, Ei und Spägg gsi. Viili hän sich das nit entgoo lo und das bschtellt, wi ich au. Aber fascht alli mit französischer Salatsoose innere italiänische Beiz. Dr Beizer het den natürlich miesse frooe wiso. Dr PPM het die richtig Antwort zum Glück grad parad ka. Franggriich ligt schliesslig nööcher wie Italie vo do us gsee. Nur dr Remo het e italiänischi Salatsoose gno. Dr Beizer het iin grad ins Härz gschlosse. Ein wo Gschmagg het, het är gmeint.

Dr erschti Gang isch umme gsi und dr Remo het immer wiider uf d Uhr gluegt. „Ich muess Heim, Dschungel food bald aa“, het är plözlich gseit. „Dschungel“ han ich zrugg gfroggt? Dr Remo het uns den kurz ufklärt. Es isch dä Quatsch im Färnsee vo dene D-Prommis (D stoot für Deppe, Duubel, …) wo im Dschungel vo Auschtralie irgend e Schissdräg miend mache wo keine interessiert.

Alli sind in aagregte Gspröch vertieft gsi, wo au scho dr Hauptgang uftischt isch worde. Ich ha myr es Entercote bschtellt. Es het natürlich „bleu“ miese si für mi. Für die wo nid wüsse was „bleu“ isch, gönts go Guugle. Wenn d‘ nid weisch wies das goot. Dr PPM isch guet im Guugle. Är het an däm Obe e übersezig gmacht vom Goldige-Härz oder so, bevor är den gmerkt het das dr Herr Vooogt oder jetzt au bekannt als „Irma die Dose“ jo e biz italiänisch verstoot.
Wie au immer. Zrugg zum ässe und wiso „bleu“. Ich han’s ebe gärn Bluetig, darum. Do ich e guts Entercote lieb aber oft enttüscht worde bi, wenn ich das innere Beiz ha bschtellt bin ich natürlich au hüt z’Obe skeptisch gsi. Doch als ich dr erschti Biss ha gnoo bin ich fascht von Stuel keit. Lägg isch das guet gsi. Butter-Zart. Gschmagglich dr absoluti Hammer. Ich ha bis jetzt nur einmol sone guts Entercote inere Beiz ka. Es isch e absolte Traum gsi. Wenn öber e guets Entercote will, die Beiz ka ich empfääle.

Dr Obe isch rächt Vortgschritte gsi und myr hän au scho s’eint oder anderi Trugge, wo dr Michi den innert kürzischter Zyt zwei Gläser kaputt het griet. Das isch den langsam s Zeiche gsi zum uns uf e Heimwäg zu mache. Es isch scho nach de Zwölfi gsi wo mir den d Beiz hän verloo.

Es isch e super gmietliche Obe gsi mit enere tolle Stimmig.
Dangg no an Michi wo die super Beiz het gfunde.

Somit schliess ich für Hüt und wünsch mir das es so wyter got.

Jahresessen-2016-02 Jahresessen-2016-03 Jahresessen-2016-05 Jahresessen-2016-04 Jahresessen-2016-07 Jahresessen-2016-06 Jahresessen-2016-08 Jahresessen-2016-10 Jahresessen-2016-09 Jahresessen-2016-11

Leave a Comment

Deine E-Mail-Adresse wird nicht veröffentlicht. Erforderliche Felder sind mit * markiert.